Pochettino nis aventurën te Manchester Unitedi, argjentinasi merr zyrtarisht drejtimin e “Djajve të Kuq”

Mauricio Pochettino ka nisur zyrtarisht detyrën e tij të re si trajner i Manchester Unitedit, duke hapur një kapitull të ri në karrierën e tij si një nga emrat më të njohur të futbollit evropian.
Emërimi i trajnerit argjentinas u konfirmua të premten e kaluar, ndërsa marrëveshja parashihte që ai të merrte drejtimin e skuadrës më 18 nëntor, pas përfundimit të angazhimeve me Përfaqësuesen e Shteteve të Bashkuara të Amerikës.
Reklamë
Pochettino kishte insistuar që fillimisht ta përmbushte deri në fund detyrën me amerikanët, duke mos dashur që vëmendja e tij të largohej nga dy ndeshjet e fundit të këtij përfaqësimi.
Ai e mbylli këtë kapitull në mënyrën më të mirë të mundshme, me dy fitore bindëse ndaj Haitit në çerekfinalet e garës së CONCACAF-it.
Pas përfundimit të angazhimit ndërkombëtar, 54-vjeçari u nis të mërkurën në mëngjes drejt Anglisë, me një fluturim direkt nga Cincinnati në Manchester.
Pa humbur kohë, trajneri i ri iu drejtua qendrës stërvitore të klubit në Carrington, ku pati mundësinë të njihej nga afër me ambientet e klubit, të takohej me disa prej futbollistëve dhe anëtarëve të stafit teknik, si dhe të fillonte përgatitjet për detyrën e re.
Kështu, Pochettino ka nisur zyrtarisht punën te Manchester Unitedi, ku tashmë e pret sfida e madhe për ta rikthyer klubin në rrugën e sukseseve dhe për ta rikthyer në nivelet që kërkojnë tifozët e “Djajve të Kuq”.
Reklamë











