Gjykata e Apelit ua ka zëvendësuar masën e paraburgimit me arrest shtëpiak dy zyrtarëve të Gjykatës Themelore të Prishtinës të dyshuar për keqpërdorim të detyrës zyrtare, Deli Halili dhe Ismajl Ismaili. Sipas vendimit të siguruar nga ATV-ja, Halili e Ismajli nëse e shkelin vendimin i cili do të zgjasë deri më 29 maj, do të mund të kthehen në paraburgim.
“Detyrohen të pandehurit të qëndrojnë në shtëpitë e tyre dhe nuk kanë të drejtë të largohen nga shtëpitë e tyre të banimit, përveç kur kjo është domosdo e nevojshme për përmbushjen e nevojave jetësore ose për kryerjen e ndonjë pune, dhe atë me lejen e Gjyqtarit të procedurës paraprake”, thuhet ndër të tjera në vendim.
Halili bashkëpunëtor profesional, e Ismajli referent në Zyrën për ekzekutimin e sanksioneve penale në Gjykatën Themelore të Prishtinës, po hetohen rreth dyshimeve se në nëntë raste nuk i ekzekutuan vendimet për burgim me qëllim të përfitimit material. Halili, e ka pranuar fajësinë gjatë intervistimit në Prokurorinë Themelore të Prizrenit. Dy zyrtarët e Gjykatës së Prishtinës u arrestuan më 29 janar, dhe rasti i ka kaluar Gjykatës dhe Prokurorisë së Prizrenit.
