Ministria e Punëve të Brendshme, në bashkëpunim me Agjencinë e Menaxhimit të Emergjencave (AME), ka lëshuar një komunikatë zyrtare, duke paralajmëruar qytetarët për rrezikun e zjarreve në pyje, fusha dhe hapësira të hapura.
Autoritetet theksuan se këto zjarre jo vetëm që shkaktojnë dëme të mëdha materiale dhe ndotin mjedisin, por janë gjithashtu një kërcënim serioz për jetën dhe sigurinë e qytetarëve.
“Zjarrvëniet janë vepër penale. Qëllimshmëria apo pakujdesia në shkaktimin e zjarrit është e dënueshme me ligj dhe ndëshkohet sipas legjislacionit në fuqi”, theksohet në deklaratën e ministrisë.
Në këtë kuadër, autoritetet kërkojnë vigjilencë të lartë dhe bashkëpunim nga qytetarët. Çdo individ që shkakton zjarr, qoftë drejtpërdrejt ose tërthorazi, do të përballet me ndjekje penale në rast se shkakton dëme në pronën publike ose private, si dhe nëse rrezikon jetën e qytetarëve dhe natyrën.
Në rast zjarri, mos hezitoni të lajmëroni shërbimet emergjente:
Qendra Emergjente – 112
Zjarrfikësit – 193
Policia e Kosovës – 192
Zyrtarët kujtojnë se çdo qytetar ka një rol vendimtar në parandalimin e zjarreve dhe se një veprim i shpejtë mund të shpëtojë jetë, të mbrojë pronën dhe të ruajë mjedisin.
“Bashkë për siguri, jetë dhe mjedis!”, thuhet në njoftim.
