Mbappe arrin shifrën e 100 golave me Real Madridin

Kylian Mbappe vazhdon të lërë gjurmë te Real Madridi. Sulmuesi francez ka arritur shifrën e 100 golave me fanellën e klubit madrilen, duke e kurorëzuar këtë sukses në mënyrën më të veçantë të mundshme: me dy gola në përballjen ndaj rivalit të përbetuar, Barcelonës.

Ylli francez ishte protagonisti kryesor i El Clásicos, të zhvilluar në kuadër të javës së dhjetë të La Ligës, ku Real Madridi triumfoi me rezultatin 2-1. Me dygolëshin e tij, Mbappe bëri diferencën në një nga ndeshjet më të rëndësishme të sezonit, duke i dhënë skuadrës madrilene një fitore me peshë të madhe.

Sulmuesi francez po dëshmon se është një nga futbollistët më vendimtarë në përballjet ndaj katalunasve. Me dy realizimet e fundit, ai ka shënuar tashmë tetë gola në shtatë paraqitjet e para në El Clásico, një statistikë që dëshmon ndikimin e tij të jashtëzakonshëm në këtë rivalitet historik.

Për Mbappen, arritja e 100 golave me Real Madridin merr edhe më shumë vlerë, pasi u realizua në një ndeshje ku presioni dhe pritshmëritë janë gjithmonë maksimale.

Përveç rekordeve me fanellën madrilene, Mbappe ka lënë pas edhe një emër të madh të futbollit spanjoll. Sipas statistikave të publikuara nga “Stats Foot”, francezi ka realizuar 258 gola në pesë ligat kryesore evropiane gjatë karrierës së tij, duke kaluar ish-sulmuesin legjendar të Real Madridit, Raul Gonzalez, i cili kishte shënuar 256 gola.

Barcelona vazhdon të jetë një nga kundërshtaret ndaj të cilëve Mbappe ka treguar më së shumti efikasitet. Katalunasit kanë pësuar 14 gola nga sulmuesi francez në ndeshjet zyrtare, ndërsa vetëm Montpellier, me 15 gola të pësuar, ka pësuar më shumë prej tij.

Në një moshë kur shumë futbollistë janë ende në kërkim të konsolidimit në nivelet më të larta, Mbappe po ndërton një karrierë që e afron gjithnjë e më shumë me emrat më të mëdhenj të futbollit evropian.

100 gola me Real Madridin dhe një dygolësh ndaj Barcelonës, një tjetër kapitull i rëndësishëm në rrugëtimin e yllit francez, i cili vazhdon të konfirmojë statusin e tij si një nga sulmuesit më të rrezikshëm në botë.