Mbrojtësi Lumbardh Dellova pritet të jetë në dispozicion për ndeshjen ndaj Turqisë, pas një keqkuptimi që ndodhi të enjten mbrëma.
Pas ndeshjes, ai deklaroi se do të mungonte për shkak të kartonëve të verdhë, por kjo rezultoi të ishte një keqinterpretim i rregullave.
Sipas rregullave të UEFA-s, kartonët e verdhë të marrë gjatë fazës së grupeve fshihen para fazës play-off. Kjo nënkupton se Dellova, edhe pse u ndëshkua në fitoren ndaj Sllovakisë, nuk është i suspenduar për sfidën vendimtare.
Ndeshja ndaj Turqisë zhvillohet të martën mbrëma në stadiumin “Fadil Vokrri”, ku mbrojtësi i CSKA Sofias pritet të jetë i gatshëm për lojë.
Vetëm në rast të ndonjë vendimi të trajnerit Franco Foda apo ndonjë lëndimi të mundshëm, Dellova mund të mbetet jashtë formacionit.
Kosova pritet të mos ketë mungesa në këtë përballje historike, ku një fitore do të siguronte kualifikimin në Kupën e Botës.
