Kryeministri i Kroacisë, Andrej Plenkoviq, ka sqaruar se retorika e përsëritur e presidentit serb, Aleksandar Vuçiq, sipas së cilës aleanca ushtarake mes Kroacisë, Shqipërisë dhe Kosovës synon Serbinë, është e pasaktë dhe e sajuar për qëllime politike të brendshme.
Në një konferencë për shtyp të shtunën, Plenkoviq theksoi se as Kroacia, as Shqipëria e as Kosova nuk kanë ndërmend të kërcënojnë integritetin territorial të askujt.
“Lloji i bashkëpunimit teknik që ekziston midis Kroacisë, Shqipërisë dhe Kosovës nuk është i drejtuar kundër Serbisë. Është një tezë plotësisht e sajuar, e përdorur për të mbështetur narrativën e një kërcënimi të jashtëm në nivel politik të brendshëm. Kroacia është anëtare e BE-së dhe NATO-s. Nuk na shkon ndërmend neve, as Shqipërisë apo Kosovës, të kërcënojmë integritetin territorial të askujt”, tha Plenkoviq, transmeton “Jutarnji”.
Ai komentoi edhe akuzat e tjera të Vuçiqit, sipas të cilave Kroacia qëndron pas protestave të studentëve dhe synon destabilizimin e Serbisë. Kryeministri kroat përmendi furnizimin e Serbisë me naftë përmes tubacionit JANAF, duke theksuar se ky veprim tregon qartë se Kroacia vepron normalisht dhe në mënyrë të përgjegjshme, pa fshehur motive kundër Serbisë.
“Kroacia i ka përmbushur të gjitha detyrat kombëtare dhe koha e luftës ka kaluar. Ne nuk veprojmë për të kërcënuar askënd, por për të garantuar sigurinë dhe stabilitetin rajonal”, përfundoi ai.
