UEFA i kërkon llogari FIFA-s për Infantinon, 42 pyetje dhe afat deri më 2 nëntor

UEFA ka shtuar presionin ndaj FIFA-s, duke kërkuar sqarime për një sërë vendimesh dhe çështjesh që lidhen me presidencën e Gianni Infantinos. Përmes një letre zyrtare, organi qeverisës i futbollit evropian i ka kërkuar FIFA-s përgjigje për 42 pyetje të ndara në 12 fusha, me afat deri më 2 nëntor.

Sipas raportimeve të Sky Sports dhe mediave të tjera britanike, Sekretari i Përgjithshëm i UEFA-s, Theodore Theodoridis, ia ka drejtuar letrën homologut të tij në FIFA, Mattias Grafström, duke kërkuar që çështjet e ngritura të marrin përgjigje pa vonesa.

Në letrën e tij, Theodoridis ka theksuar se UEFA pret sqarime të menjëhershme dhe se këto çështje nuk duhet të shtyhen për mbledhjen e ardhshme të Këshillit të FIFA-s.

“Këto pyetje kërkojnë përgjigje tani. Ato nuk mund të shtyhen deri në mbledhjen e ardhshme të Këshillit të FIFA-s, dhe as reformat e ardhshme të qeverisjes nuk mund të zëvendësojnë shqyrtimin e vendimeve të marra tashmë dhe llogaridhënien për to”, thuhet në letrën e Theodoridis.

Ndër çështjet që kërkojnë sqarime janë projekti FIFA Forward Enterprise (FFE), tashmë i braktisur, si dhe Çmimi i Paqes i FIFA-s. UEFA ka qenë ndër zërat më kritikë ndaj Infantinos pas propozimit për krijimin e një kompanie që do të menaxhonte interesat komerciale të garave të FIFA-s, përfshirë Kupën e Botës, me mundësinë e shitjes së një pjese të aksioneve te investitorët privatë.

Përplasjet rreth këtij projekti kanë shtuar tensionet mes dy institucioneve, ndërsa kërkesa e fundit e UEFA-s tregon se organizata evropiane po insiston në transparencë dhe llogaridhënie për vendimet e marra nga udhëheqja e FIFA-s.

Në anën tjetër, Infantino pritet të kandidojë për një mandat të ri në zgjedhjet presidenciale të FIFA-s, të planifikuara për mars të vitit 2027. Afati për paraqitjen e kandidaturave përfundon më 18 nëntor, çka e bën këtë periudhë veçanërisht të rëndësishme për të ardhmen e udhëheqjes së futbollit botëror.