Kombëtarja e Kosovës në futsall nis përgatitjet për dy sfidat ndaj Italisë

Kombëtarja e Kosovës në futsall ka hyrë në fazën përgatitore për dy përballjet e rëndësishme ndaj Italisë, të vlefshme për Grupin 10 të fazës “Main Round” të kualifikimeve për Kupën e Botës 2028.

Dardanët i presin dy sfida të vështira ndaj italianëve, fillimisht në shtëpi më 6 nëntor, me fillim nga ora 20:00, ndërsa ndeshja e kthimit do të zhvillohet më 10 nëntor në Itali, po ashtu nga ora 20:00.

Kombëtarja kosovare i pret këto dy takime me moral të lartë, pas triumfit të rëndësishëm 3:2 ndaj Gjeorgjisë në udhëtim. Kjo fitore ka qenë një shtysë pozitive për skuadrën, e cila synon të vazhdojë me rezultate të mira në garën kualifikuese.

Megjithatë, përballjet me Italinë do të përbëjnë një provë të madhe për kapacitetet e Kosovës, pasi përballë do të ketë një kundërshtar me përvojë dhe traditë në futsallin evropian.

Dardanët synojnë të shfrytëzojnë ndeshjen e parë në shtëpi për të marrë një rezultat sa më të favorshëm, përpara udhëtimit në Itali, ku do të zhvillohet dueli i dytë.

Objektivi i Kosovës mbetet vazhdimi i rrugëtimit me hapa të sigurt drejt ëndrrës për një kualifikim historik në Kupën e Botës 2028.