Festivali Ndërkombëtar i Teatrove – Prishtina International Theater Festival “Burbuqe Berisha” dhe Teatri AAB “Faruk Begolli” nga Prishtina, kanë hapur thirrjen për aplikim për të gjitha teatrot, kompanitë teatrore që të aplikojnë për projektet e tyre për pjesëmarrje në edicionin e tetë të PITF 2024, i cili do të mbahet nga 20-26 Maj 2024.
Lidhur me këtë, e ftuar në emisionin “Alarm”, në ATV ka folur drejtoresha artistike e këtij festivali, Doruntina Alshiqi.
Alshiqi tha se edhe për këtë edicion ka interesim të lartë të aplikuesve nga vende të ndryshme të botës, derisa përmendi se pritet të ketë edhe risi të reja lidhur me këtë festival.
“Ka pasur një interesim të madh ende pa e hapur aplikimi dhe jemi shumë të kënaqur që ka pasur kaq aplikime nga shumë teatro botërore të ndryshme që kanë apliku për këtë edicion. Besoj që për shikuesit do të jetë një ndër edicionet më të mira që kemi pasur ndonjëherë, sepse do të ketë edhe risi të reja, si për ndarjen e çmimeve, ashtu edhe tek pjesa se ku do të mbahen shfaqjet. Vlen të theksohet se ka pasur interesim edhe nga disa shtete jashtë Evropës, të tilla si Iraku, Koreja Jugore, Brazili, etj”, tha ajo.
Ndryshe, ky festivali ka karakter garues, me një juri profesionale si dhe dy juri të veçanta të studentëve dhe të medias. Festivali shpërblen aktorin/aktoren më të mirë si dhe ndan Çmimin për shfaqjen më të mirë, ndërsa nuk ka kufizim të zhanrit.
Qëllimi i festivalit është të prezantojë projektet teatrore me cilësi të lartë nga e gjithë bota dhe të shkëmbejë mendime, ide, plane dhe përvoja, si dhe bashkëpunimet e ardhshme në shkëmbimin e projekteve./atvlive.tv/
