Sot në ora 10:00, në Dhomat e Specializuara të Kosovës në Hagë, mbahet konferenca e parë pas përfundimit të fazës së Prokurorisë në rastin ndaj ish-krerëve të UÇK-së: Hashim Thaçit, Kadri Veselit, Rexhep Selimit dhe Jakup Krasniqit.
Zyra e Prokurorit të Specializuar ka përmbyllur paraqitjen e provave më 15 prill 2025, dhe tashmë mbrojtja ka paralajmëruar mocione për rrëzimin e një ose më shumë pikave të aktakuzës.
Në konferencën e sotme do të diskutohet për hapat e ardhshëm procedural, ndërsa avokatët e të akuzuarve kanë njoftuar se planifikojnë të paraqesin dëshmitarët e tyre, por kjo do të ndodhë vetëm pasi të merret vendimi për mocionet për rrëzimin e akuzave.
Kujtojmë se në deklarimet e tyre të para, të bërë në vitin 2020, Thaçi, Veseli, Selimi e Krasniqi janë deklaruar të pafajshëm për të gjitha akuzat që u janë ngritur.
