Përgatiti: Driton Sadiku
Lista e orarit të kujdestarisë për avokatë ka mbetur ende në mur, ndonëse është e vitit 2012. Edhe libra e dokumente që atëkohë janë përdorur, janë gjithandej nëpër dysheme.
Objekti në të cilin për një kohë ishte e vendosur Gjykata Themelore në Vushtrri, tashmë ka mbetur në gjendje të mjerueshme.
Tejet shqetësuese, gjendjen aktuale të objektit e konsideron edhe komuna e Vushtrrisë.
“Gjendja aktuale e atij objekti është shumë e keqe, e shohim se sot është bërë një deponi e mbeturinave, edhe pse ne e kemi pastruar tri herë, megjithatë hidhen mbeturina mandej është bërë një vend i narkomanëve”, tha kryetari i Vushtrrisë, Ferit Idrizi.
Andaj kjo ka shtyrë komunën të kërkojë nga Ministria e Kulturës të marrë çfarëdo vendimi vetëm që objekti të mos mbetet në këtë gjendje.
“Në qoftë se e vlerësojnë ata se duhet me e rrënu, ne do ta rrënojmë, në qoftë se e vlerësojnë se duhet me e restauru atëherë le të na ndajnë buxhet dhe e bëjmë restaurimin dhe ne e marrim në shfrytëzim”, tha Idrizi.
Të të njëjtit mendim janë edhe qytetarët, ndonëse të arsyeshëm e shohin rrënimin.
“Sigurisht, është prishur ambienti, ose me punu siç duhet ose me e hekë”, thotë Sabit Neziri, qytetar.
“Gjithqysh duhet me e rrezu, këtu nuk ka kujtime të mira, kjo ka qenë gjykatë që janë dënuar njerëzit me vite, edhe këta duan me e bë monument historik, ky nuk është monument”, tha Bekim Januzi, qytetar.
Në qershor të 2021-tës pushteti paraprak në Vushtrri kishte filluar rrënimin e objektit si projekt për zgjerimin e sheshit të qytetit, por Ministria e Kulturës kishte pezulluar punimet me arsyetimin se ky objekt duhet të ruhet si trashëgimi kulturore.
Por, se çfarë do të ndodhë me fatin e këtij objekti, ende nuk dihet. Ministria e Kulturës nuk ktheu përgjigje as pas disa ditësh pritje.
Më shumë detaje i gjeni në Edicionin Qendror të lajmeve në videon më poshtë:
