Gjashtë xhudistë të Kosovës në Grand Prix Zagreb 2026

Kosova do të përfaqësohet nga gjashtë xhudistë në Grand Prix Zagreb 2026, një prej garave të rëndësishme të kalendarit ndërkombëtar të xhudos, e cila do të mbahet nga 13 deri më 15 nëntor në kryeqytetin e Kroacisë.

Përfaqësuesja e Kosovës në këtë kompeticion do të përbëhet nga tri garuese në konkurrencën e femrave dhe tre garues në atë të meshkujve, të cilët do të synojnë paraqitje sa më të mira dhe rezultate pozitive për vendin.

Në kategorinë e femrave, Kosovën do ta përfaqësojnë Erza Muminoviq në kategorinë deri në 48 kilogramë, Fatjona Kasapi në atë deri në 52 kilogramë, si dhe Flaka Loxha në kategorinë deri në 57 kilogramë.

Ndërkohë, në konkurrencën e meshkujve, në tatami do të zbresin Akil Gjakova dhe Dardan Cena në kategorinë deri në 73 kilogramë, ndërsa Luke Davies do të garojë në kategorinë deri në 81 kilogramë.

Ekipi kosovar do të udhëhiqet nga trajnerët Fatos Tabaku dhe Kushtrim Gashi, të cilët do të jenë në mbështetje të garuesve gjatë këtij aktiviteti ndërkombëtar.

Grand Prix Zagreb 2026 paraqet një tjetër mundësi për xhudistët kosovarë që të matin formën dhe përgatitjen e tyre përballë kundërshtarëve ndërkombëtarë, duke synuar rezultate sa më të mira dhe përfaqësim dinjitoz të Kosovës.