Gerrard me kritika të ashpra ndaj Martinezit, dyshon se dëshiron të largohet nga Manchester Unitedi

Legjenda e Liverpoolit, Steven Gerrard, ka ngritur dyshime të mëdha rreth të ardhmes së Lisandro Martinezit te Manchester Unitedi, duke sugjeruar se mbrojtësi argjentinas mund të jetë duke krijuar probleme brenda skuadrës për të siguruar largimin gjatë afatit kalimtar të janarit.

Duke folur në emisionin “The Overlap Daily”, ish-kapiteni i Liverpoolit nuk i ka kursyer kritikat ndaj paraqitjeve dhe sjelljes së fundit të futbollistit, të cilat i ka cilësuar si zhgënjyese.

“Kam përshtypjen se ai po mendon: Dua të largohem nga këtu sa më shpejt”, deklaroi Gerrard.

Martinez është vënë në qendër të vëmendjes pas kartonit të kuq të marrë në humbjen 2-0 të Manchester Unitedit ndaj Chelseat, ndërsa situata e tij është komplikuar edhe më shumë pas kritikave të mëparshme ndaj drejtorit të futbollit të klubit, Jason Wilcox.

Gerrard beson se sjellja e argjentinasit ka dëmtuar skuadrën, duke theksuar se ai ka zhgënjyer bashkëlojtarët, klubin dhe tifozët.

Sipas tij, përjashtimi nga loja ishte një veprim egoist, sidomos duke marrë parasysh mbështetjen që Martinez ka marrë nga trajneri.

Ish-mesfushori anglez ka paralajmëruar se sjelljet individuale të futbollistëve mund të bëhen pengesë për Manchester Unitedin në përpjekjet për t’u rikthyer te rezultatet pozitive.

Megjithatë, pavarësisht kritikave dhe spekulimeve për të ardhmen e tij, drejtuesit e klubit nga “Old Trafford” vazhdojnë të shprehin besimin në përkushtimin e mbrojtësit argjentinas.