Drejtori i Filharmonisë së Kosovës, Baki Jashari, në një intervistë në emisionin e mëngjesit ALARM në ATV, tha se viti 2024 ka shënuar një ngritje historike sa i prket buxhetit.
Ai thotë se me rritjen e buxhetit për këtë institucion, këtë vit do të ketë shumë më shumë aktivitete koncertale.
“Vitet e fundit, Filharmonia e Kosovës, e ka dyfishuar dhe trefishuar aktivitetin koncertal. Natyrisht edhe viti 2024 nuk përjashtohet nga kjo, me që mund te them që kjo ka bazë pikërisht në përkrahjen e madhe ky institucion e gëzon nga Ministria e Kulturës, natyrisht ne jemi institucion vartës i Ministrisë së Kulturës, por me rritjen e buxhetit, dukshëm bazuar natyrisht në përformancat e Filharmonisë në dy vitet e kaluara, viti 2024 shënon një ngritje të themi historike sa i përket buxhetit që nga themelimi Filharmonisë në vitin 2000”, tha Jashari.
Ai tregoi se deri në 2-3 vitet e fundit, buxheti për Filharmoninë e Kosovës ka qenë 200-300 mijë euro, ndërsa sivjet, për herë të parë ky institucion ka një buxhet prej 1 milionë euro.
“Që nga themelimi i Filharmonisë, sigurisht ato fillimet kanë qenë shumë modeste me buxhet, por deri 2-3 vitet e fundit buxheti ka qenë 200-300 mijë euro që është një buxhet relativisht i vogël në krahasim me institucionet në rajon dhe vitin e kaluar është kaluar në një shifër mbresëlënëse në 800 mijë euro dhe ajo çka natyrisht na bënë të lumtur që mund të realizojmë më shumë aktivitet këtë vit me këtë buxhet, është që buxheti për vitin 2024 është plotë një milion euro”, tha Jashari. /atvlive.tv
Intervistën e plotë të Baki Jasharit në ALARM e gjeni në videon më poshtë:
