Ferrari synon ta mbyllë sezonin fuqishëm, Hamilton mendon për revolucionin e vitit 2027

Ferrari po hyn në fazën vendimtare të sezonit në Formula 1 me objektiva të qarta: të fitojë sa më shumë gara dhe të sigurojë vendin e dytë në Kampionatin e Konstruktorëve, ndërsa përgatit terrenin për një rikthim më të fuqishëm në vitin 2027.

Edhe pse lufta për titullin kampion është shtyrë për një sezon tjetër, skuadra italiane dëshiron ta përfundojë kampionatin me rezultate pozitive. Ndërkohë, Lewis Hamilton dhe Charles Leclerc vazhdojnë garën për pozita të larta në renditjen e pilotëve.

Pas 18 garave, Ferrari ka regjistruar dy fitore, por ende nuk ka arritur të sigurojë asnjë pole position. Makina SF-26 ka treguar potencial të mirë në shasi dhe aerodinamikë, megjithatë njësia e fuqisë mbetet një nga fushat ku kërkohen përmirësime.

Pikërisht këtu përqendrohet edhe Lewis Hamilton, i cili beson se vendimet e marra gjatë dimrit mund të jenë vendimtare për suksesin e sezonit të ardhshëm.

Sipas britanikut, Ferrari duhet të identifikojë me kujdes pikat ku mund të fitojë kohë, duke ruajtur njëkohësisht cilësitë që makina ka dëshmuar deri më tani.

Hamilton theksoi se edhe përmirësime të vogla mund të bëjnë diferencën, duke sjellë përfitime prej disa të dhjetash të sekondës në çdo kthesë.

Mesazhi i tij është i qartë, Ferrari nuk ka nevojë të ndryshojë gjithçka, por duhet të korrigjojë dobësitë dhe të shfrytëzojë potencialin ekzistues.

Tani, përveç objektivit për ta mbyllur sezonin sa më mirë, “kokëkuqja” duhet të marrë vendimet e duhura për vitin 2027, me shpresën që Hamilton dhe Leclerc ta rikthejnë skuadrën italiane në luftën për titullin kampion.