Përgatiti: Bleta Gashi
Kombëtarja e Kosovës në futboll ka zhvilluar të hënën stërvitjet në Kampin Nacional në Hajvali, një ditë para ballafaqimit me Uellsin në kuadër të grupit 4, në kuadër të kualifikimeve për në Kampionatin Evropian Euro 2025.
Trajnerja Anel Andersen shpresojnë në paraqitje më të mirë, ndonëse janë të vetëdijshme për forcën e kundërshtareve.
“Ju duhet thjesht ta shikoni radhitjen e ekipeve, ne jemi ekipi më i fundit i renditur në të gjithë ligën e ekipeve B. Prandaj, jemi këtu për të mësuar, dhe dëshirojmë të kemi fitore por, duhet të jemi shumë modestë dhe të kuptojmë që ky është një nivel krejtësisht tjetër për ne, ne duam të fitojmë çdo lojë, mirëpo kjo është e vështirë”, tha Andersen.
Disa nga futbollistet e kombëtares thanë se do të hyjnë në fushë për të marrë rezultat pozitiv.
“Jemi duke u munduar që ato gabimet që i kemi bërë lojën e kaluar të jemi më kompakt, t’i ikim presionit. Jemi duke u munduar tani t’i përmirësojmë. Besoj që do të shkojë shumë më mirë loja, e dimë që është një lojë shumë e vështirë me liderin e grupit, po besoj që ne do të japim më të mirën dhe besojmë që do të shkojë mirë loja”, tha Lumbardha Misini, futbolliste.
“Stërvitjet po shkojnë mirë, jemi duke u përgatitur për këtë ndeshje të vështirë që e kemi. E dimë se është një ekip shumë i shpejtë dhe janë të fortë, por ne jemi duke u përgatitur si ekip maksimalisht edhe atmosfera në grup është shumë e mirë dhe mendojmë se do të dalim me një rezultat pozitiv”, tha Valentina Metja, futbolliste.
Para ndeshjes me Ukrainën, Kosova ishte në seri prej 14 ndeshjeve pa humbje. Kishte 13 fitore në këtë seri, gjatë së cilës nga Liga C kaloi në Ligën B të Ligës së Kombeve.
Futbollistet e Kosovës e presin Uellsin në Podujevë për shkak të rinovimit të fushës së stadiumit “Fadil Vokrri” në Prishtinë.
Ndërkohë, Kosova i ka përmbyllur në mënyrën më të mirë të mundshme kualifikimet për Kampionatin Evropian U19. Pas Gjibraltarit dhe Luksemburgut, Dardanet të hënën e mposhtën Izraelin, me rezultat 2:1. Kjo ishte ndeshja e fundit kualifikuese, me ç’rast edhe dolën triumfuese të Grupit 3 në Ligën B, duke avancuar kështu në Ligën A, për ciklin e ardhshëm kualifikues.
