Bizneset në Prishtinë do të organizojnë një protestë paqësore sot, duke bllokuar hyrjet kryesore të qytetit për dy orë në kundërshtim me liberalizimin e tregut të energjisë elektrike, që pritet të hyjë në fuqi më 1 qershor.
Oda Ekonomike e Kosovës njofton se protestat do të zhvillohen nga ora 10:00 deri në 12:00, ndërsa bllokimi do të prekë disa hyrje kryesore të Prishtinës.
Hyrja nga Veterniku dhe Gjilani, duke përfshirë hyrjen nga Albi Mall dhe poshtë Veternikut, do të bllokojë aksesin nga Ferizaj, Gjilan dhe Aeroporti.
Po ashtu, hyrja nga Fushë-Kosova dhe Mitrovica, përfshirë hyrjen nga rrethi i Madh te Lakrishtja (Dukagjini Tower), do të jetë e bllokuar, ndërsa hyrja nga Podujeva në lagjen Vranjevc, te ish-Humanisti dhe udhëkryqi pranë bankës Raiffeisen, do të bllokojë hyrjet dhe daljet nga Podujeva dhe lëvizjet nga Dragodani drejt Shkabaj/Orlloviq.
Automjetet e kompanive të prekura nga vendimi për liberalizimin e tregut të energjisë do të vendosen në rrugë për të bllokuar trafikun.
Oda Ekonomike paralajmëron se nëse kërkesat e tyre nuk plotësohen, protestat do të vazhdojnë dhe mund të zgjasin deri në 4 orë, duke përfshirë bllokimin e plotë të hyrjeve të Prishtinës.
“Në mungesë të reagimit institucional: protesta do të vazhdojë çdo ditë, gjatë gjithë ditës, deri në reflektim dhe veprim konkret nga institucionet përgjegjëse”, thuhet në njoftim.
