Themeluesi i Microsoft-it, Bill Gates, ka dhuruar rreth 50 milionë dollarë për një organizatë joqeveritare që mbështet kandidaten demokrate për president Kamala Harris, shkruan New York Times.
Në një prononcim për gazetën amerikane, Gates as nuk i konfirmoi dhe as nuk i mohoi akuzat për dhurimin, por tha se “këto zgjedhje janë ndryshe”. Gates është i shqetësuar për politikat ekonomike të kandidatit republikan për president Donald Trump dhe shkurtimet e mundshme të planifikimit familjar dhe programeve globale të shëndetit, të cilat janë çështje kyçe për Fondacionin Bill & Melinda Gates.
Ish-gruaja e Bill Gates, Melinda, gjithashtu mbështeti Harris dhe bëri një donacion të madh për fushatën e saj. Pretendimet për dhurimin e Gates vijnë pasi parashikimet po ndryshojnë në lidhje me shanset e Kamala Harris për të mundur Trumpin në zgjedhjet e ardhshme presidenciale.
Platforma Polymarket (Polymarket), e cila merret me parashikimin e rezultateve të zgjedhjeve bazuar në tregun e basteve, parashikoi se Trump ka një shans 64 për qind për të fituar zgjedhjet, të cilat do të mbahen më 5 nëntor. Miliarderi Stanley Druckenmiller tha javën e kaluar në një intervistë me Bloomberg se ekspertët e tregut po llogarisin në fitoren e Trump.
