Gjykata Themelore në Pejë ka caktuar masën e paraburgimit prej 30 ditë ndaj tre të dyshuarve Gzim Gashi, Faik Gashi dhe Selim Gashi, për kultivimin e bimës së hashashit e kokainës.
Kjo është bërë e ditur nga aktvendimi i siguruar nga “Betimi për Drejtësi”.
Fillimisht, Prokuroria Themelore në Pejë, kishte marrë vendim mbi fillimin e hetimeve kundër të dyshuarve Gzim Gashi, për shkak të dyshimit të bazuar se kishte kryer veprën penale, “Kultivimi i bimës së hashashit, Shkurres së kokainës ose bimëve të hashashit”, ndërsa për të dyshuarit Faik dhe Selim Gashi, aktvendim për zgjerimin e hetimeve për veprën e njëjtë.
Gjykata më 31 tetor 2024, kishte mbajtur dhe zhvilluar seancën dëgjimore për caktimin e paraburgimit, ku prokurori i shtetit Ersan Qavolli kishte deklaruar se janë plotësuar kushtet themelore për dyshimin e bazuar se të pandehurit kishin kryer veprën penale të lartcekur.
Ai kishte theksuar se përmes raporteve janë identifikuar parcela e cila dyshohet se ka të mbjellur narkotikë.
