Ka përfunduar e qetë protesta e organizuar nga serbët lokal në Mitrovicën e Veriut. Në protestë u kundërshtua hapja e Urës së Ibrit, e cila është e mbyllur për qarkullim të veturave që nga përfundimi i luftës në Kosovës.
Sipas zëvendësdrejtorit të Policisë së Kosovës për rajonin e veriut, Veton Elshani, numri i protestueseve të cilët ishin prezentë në sheshin “Car Llazar”, ka qenë rreth 600.
“Numri përafërsisht sipas neve është 600. Situata është e qetë. Në jemi këtë vend për të siguruar rendin publikë çdo gjë është në rregull”, tha ai.
Ai ka shtuar se protesta është paralajmëruar që nga dita e shtunë.
Për të siguruar rendin publik të pranishëm kanë qenë Policia e Kosovës, KFOR dhe EULEX.
Në protestë kanë marrë pjesë deputeti i Listës Serbe, Igor Simiq, ish-deputeti, Slavko Simiq, si dhe kryetari partisë së Serbëve të Kosovës, Aleksandar Jabllanoviq.
Kjo protestë është thirrur pas paralajmërimeve të Qeverisë së Kosovës për hapjen e urës së lumit Ibër.
