Në fundjavën e kaluar, Federata e Kick Boksit të Kosovës mori pjesë në Kampionatin Ballkanik të Kick boksit të mbajtur në Bari të Malit të Zi duke arritur një sukses të jashtëzkonshëm me 17 medalje të fituara, në mesin e të cilave edhe një e artë.
Në një konferencë për media të mbajtur të enjten, Presidenti i Federatës së Kick Boksit, Fatmir Makolli, tha se është mëse i kënaqur me këto rezultate pasi që sportistët dhanë gjithçka nga vetja për të arritur sukses.
“Të arrish në një Kampionat Ballkanik t’i fitosh 17 medalje, kjo nuk ka koment për të folur më shumë por dihet çfarë konkurrence është në Kampionatin Ballkanik, dihet që shtete tona afër që i kemi e kanë kick boksin shumë të fuqishëm dhe më përpara se ne dhe konkurrenca është shumë e madhe. Besoj që sportistët tanë denjësisht na kanë përfaqësuar në kampionat dhe të gjitha garuesit e kanë dhënë maksimumin, ndonjëherë kanë dal edhe nga vetvetja vetëm për të arritur suksese dhe për të pasur medalje nga ky kampionat”, tha Makolli.
Por, Makolli i ka bërë thirrje Ministrisë së Sportit që t’i përkrahin më shumë këta sportistë.
“Ne ftesën ua kemi dërguar edhe ministrisë dhe departamentit të sportit. Besoj që do të ishte mirë ata t’i shohin këto rezultate…Kosovapressi ka qenë e pranishme në Kampionatin Ballkanik dhe e ka parë realitetin e kampionatit dhe besoj që këta përfaqësues që e përfaqësojnë shtetin do ishte mirë të ishin këtu të pranishëm për t’i parë rezultatet, por besoj që do t’i shohin dhe unë i ftoj që t’i presin dhe t’i përkrahin sportistët dhe t’i përgëzojnë për rezultatet e arritura në kampionat”, tha Makolli.
Fituesi i medaljes së artë në këtë kampionat, Fatlind Ejupi, tha se ndihet jashtëzakonisht krenar që e ka përfaqësuar shtetin e Kosovës në këtë kompeticion.
“Jam fitues i medaljes së artë në Kampionatin Ballkanik. Është një krenari e madhe ta përfaqësosh shtetin tënd, po ashtu edhe t’i ngrisësh ngjyrat e shtetit tënd lart si në ndeshjen e fundit që e kemi bërë në finale”, deklaroi Ejupi.
Kurse, ai që rrëmbeu medaljen e argjendtë, Gen Hyseni, kjo ishte hera e dytë që e përfaqësoi Kosovën në një garë të këtij niveli ndërkombëtar.
“Për mua është hera e dytë që unë e përfaqësoj Kosovën në garat ndërkombëtare ku po ashtu është edhe hera e dytë që unë marr medalje të argjendtë ku herën e fundit në Kampionatin Ballkanik kam arritur deri në finale”, theksoi Hyseni.
Shumë të kënaqur me arritjet e kick boksierëve u shprehën në fund edhe dy përzgjedhësit e Kosovës, Ilir Menxhiqi dhe Nysret Salihaj.
