Përgatiti: Pranvera Krasniqi
Thonë se janë pjesa më e margjinalizuar e shoqërisë. Prandaj në Ditën Ndërkombëtare të Romëve, pjesëtarë të këtij komuniteti po i kërkojnë të drejtat e tyre.
Kërkesat më së shumti lidhen me shkollim dhe mirëqenie.
“Duhet të përfshihemi më shumë në institucione, punësim, arsim. Të jemi të barabartë me të gjitha kategoritë e tjera shoqërore, sepse jemi njerëz”, thotë një qytetar i komunitetit rom.
Për nder të kësaj dite, komuna e Prishtinës mbajti një aktivitet në sheshin “Adem Jashari”, të shoqëruar me këngë në gjuhën romane.
Këtu u shpërndanë edhe fletushka me histori të këtij komuniteti.
Përfshirja e romëve në sferat e shoqërisë, është drejtim në të cilin i pari i Prishtinës, Përparim Rama, zotohet se është duke punuar.
“Ju uroj romëve ditën ndërkombëtare të tyre, është komunitet i cili fatkeqësisht nuk ka gjetur vend më parë në shumë rrugë, mirëpo jemi duke punuar sidomos në arsim dhe punësim…”, tha Rama.
Për ditën e tyre, romët i ka uruar edhe presidentja Vjosa Osmani, e cila vlerësoi kontributin dhe angazhimin e këtij komuniteti, duke kujtuar kulturën e pasur, historinë dhe arritjet e komunitetit rom në Kosovë dhe më gjerë.
8 prilli u shpall Dita Ndërkombëtare e Romëve, në vitin 1990, në ditën kur u mbajt Kongresi i parë i Unionit Ndërkombëtar Rom.
