Ekipi menaxhues për hartimin e draft-statutit të Asociacionit të komunave me shumicë serbe, i emëruar nga ish-ministri i Pushtetit Lokal, Goran Rakiq, ka injoruar ftesën për takim nga ministri aktual, Elbert Krasniqi.
Gati një muaj pasi ATV-ja raportoi se Danijela Vujicic, deputete e partisë së Aleksandar Vucicit në parlamentin e Serbisë, është kryesuese e ekipit, ministri Krasniqi publikoi tri vendime të qeverive të kaluara për ndryshimet në përbërje.
“Nga përbërja fillestare, vetëm dy anëtarë kanë mbetur të pandryshuar; Igor Kalamar dhe Dejan Radojkoviq. Dy të tjerë janë ndryshuar vazhdimisht. Danijela Vujiçiq është anëtarja më e re e këtij ekipi, sipas vendimit të vitit 2020. Njëherësh, ajo është emëruar edhe si koordinatore e Ekipit Menaxhues. Pika e gjashtë e vendimit të vitit 2020 parasheh që Ekipi Menaxhues koordinohet dhe i raporton për aktivitetet e tij ministrit të Administrimit të Pushtetit Lokal. Ju njoftoj se të martën më 18 prill, si ministër unë i jam drejtuar me ftesë për takim këtij grupi. Ftesë kjo që nuk ka marrë përgjigje”, tha Krasniqi.
Kryeministri Albin Kurti nuk tregoi nëse do ta ndryshojnë përbërjen e ekipit.
“Ministri i Administrimit të Pushtetit Lokal, Elbert Krasniqi, e ka ftuar në takim ekipin menaxhues, por ai nuk është përgjigjur. Pra, është kjo Ministri në kuadër të Qeverisë, e cila merret për së afërmi me këtë menaxhues për draft-statutin”, tha Kurti.
Edhe pse Vujicic ishte emëruar në Qeverinë e tij, në një intervistë në CONTEXT në ATV, ish-kryeministri Avdullah Hoti tha se ekipi nuk ka prodhuar asgjë atëkohë.
“Unë nuk jam marrë me Asociacionin e komunave, as me status të Kishës Ortodokse. Qeveri pas qeverie në bazë të marrëveshjes së vitit 2013, ministri i pushtetit lokal është dashur ta themelojë këtë ekip menaxhues. Nuk ka pasë asnjë zhvillim në këtë drejtim, sepse fokusi im si kryeministër ka qenë në marrëveshjen përfundimtare”, tha Hoti.
Sipas marrëveshjes së vitit 2013, Ekipi Menaxhues i cili ka për detyrë hartimin e statutit të Asociacionit, duhet të përbëhet nga përfaqësuesit e katër komunave me shumicë serbe në veri të Kosovës.
Në prag të takimit të nivelit të lartë në Bruksel, më 2 Maj, në një intervistë në Sllovaki, Përfaqësuesi i Posaçëm i BE-së për dialogun, Miroslav Lajcak, tha se është e rëndësishme të fillojë puna për përcaktimin e statusit dhe kompetencave të Asociacionit. /atvlive.tv
