Përgatiti: Arton Hamiti
Brenda një viti, Instituti i Mjekësisë Ligjore u përfshi dy herë nga zjarri. Të martën, një pjesë e dokumenteve që ndodheshin në zyrat që u dogjën, u bënë shkrumb e hi.
Dëmet mund të ishin më të vogla nëse sistemi kundër zjarrit do të ishte më efikas. Por, tenderi për “Servisim dhe mirëmbajtje të aparateve kundër zjarrit” i hapur fillimisht më 30 mars, kishte dështuar.
Tenderi ishte hapur edhe në korrik, por për shkak të ankesave në Organin Shqyrtues të Prokurimit, është i pezulluar. Tenderi për mirëmbajtje të pajisjeve kundër zjarrit i hapur në maj të vitit të kaluar, i ka dështuar 3 herë edhe Shërbimit Korrektues. I njëjti tender, rrezikon të dështojë përsëri teksa është pezulluar në tetor të këtij viti.
Duke mos u përgjigjur në pyetjen e redaksisë se kur është bërë servisimi i aparateve kundër zjarrit për herë të fundit, nga Shërbimi Korrektues njoftuan se posedojnë pajisje të mjaftueshme.
“Përveç pajisjeve në secilin institucion, kemi edhe stafin e trajnuar dhe të certifikuar si zjarrfikës, të cilët janë përgjegjës për mirëmbajtjen e sistemit. Po ashtu, në të gjitha institucionet korrektuese janë të vendosura edhe aparatet e nevojshme kundër zjarrit, të cilat aktualisht janë në gjendje të mirë dhe të gatshme për përdorim në rast nevoje”, thuhet në njoftimin e SHKK-së.
Ndërkohë, shoqëria civile sheh mangësi në procedurat e prokurimit publik në vazhdimësi.
Tenderi në vlerë prej 100 mijë eurosh, përveç servisimit parashihte edhe furnizimin me aparate për fikjen e zjarrit, hidrantë të ujit me pajisje përcjellëse dhe detektor tymi për Institucionet Korrektuese dhe Institucionin e Mjekësisë Ligjore.
