Përgatiti: Arton Hamiti
Me 137 vota Serbia është zgjedhur për herë të tretë, anëtare e Bordit Ekzekutiv të Organizatës së Kombeve të Bashkuara për Arsim, Shkencë dhe Kulturë.
Duke i marrë parasysh raportet mes dy vendeve, prania e Serbisë në bordin ekzekutiv deri në vitin 2027, do t’i vështirësojë përpjekjet e Kosovë për anëtarësim në UNESCO.
Krahas Serbisë, në grupin e dytë të Bordit Ekzekutiv të UNESCO-s, nga një ulëse morën edhe Shqipëria, Sllovakia dhe Çekia.
Bordi ekzekutiv i UNESCO-s në tetor të vitit 2015, kishte vendosur ta përfshijë rekomandimin për pranimin e Kosovës në anëtarësinë e kësaj organizate.
Megjithatë, konferenca e përgjithshme nuk kishte votuar në favor të pranimit të Kosovës. Për pranim në UNESCO ishin nevojitur 95 vota, teksa Kosova u përkrah nga 92 vende, 50 ishin kundër dhe 29 abstenuan.
Ndryshe, kërkesën për pranimin e Kosovës në UNESCO në vitin 2015, e kishte paraqitur formalisht Shqipëria.
