Përgatiti: Arton Hamiti
Aktvendimi i Gjykatës Komerciale, i cili aprovon si të bazuar kërkesën e paditësit “Pro & CO Group”, për shtyrje të ekzekutimit të vendimit të nxjerrë nga Organi Shqyrtues i Prokurimit, më 19 prill 2023, lidhur me “Ndërtimin e Rrugës A – Pjesa e Parë”, është publikuar më 23 tetor.
Vendimin për pezullimin e punimeve, kompania e kontraktuar, “Sallahu Shpk” e ka vlerësuar të njëanshëm, meqë siç thotë Gjykata Komerciale, nuk e ka përfshirë në proces si palë e interesuar gjatë trajtimit të lëndës. Kompania pretendon se çështja nuk ka marrë epilog, andaj punimet janë duke vazhduar.
“Nga faktet e prezantuara, përveç zbatimit të gabuar të dispozitave materiale dhe procedurale, si dhe tejkalimit të kompetencave në procesin e vendimmarrjes lidhur me rastin në fjalë, në Arsyetimin e Aktvendimit KA 181/23, shohim se Gjyqtarja Vlora Pacolli – Rexhepi, u ka falur besimin provave dhe të dhënave të pavërteta – të rrejshme dhe të paqëndrueshme të një pale të cilës i ka humbur legjitimiteti, duke paraqitur kështu një gjendje inekzistente. Konsiderojmë se Gjykata nuk i ka trajtuar të gjitha aspektet e lëndës, rrjedhimisht vendimin e konsiderojmë të njëanshëm. Njëherësh jua bëjmë me dije se për shkak të evidentimit të gabuar të fakteve, ne do t’i drejtohemi me Kërkesë Gjykatës Komerciale, për të na përfshirë në proces si palë e interesuar gjatë trajtimit të lëndës nga Dhoma e Shkallës së Dytë e Gjykatës Komerciale, si dhe Ankesë ndaj Aktvendimit të lartcekur”, thuhet në reagimin e “SALLAHU SHPK”.
Megjithatë, sipas juristëve, punimet duhet të ndalen.
Sidoqoftë, “Rruga A” konsiderohet si një prej projekteve me rëndësi të madhe për kryeqytetin.
Teksa ishte cilësuar si projekti më i madh i dekadës së fundit në kryeqytet, pjesa e parë e rrugës “Jim Xhema” ishte paraparë të kushtojë 8.4 milionë euro.
