Përgatiti: Sara Shehu
Para katërve muajve, Ministri i Shëndetësisë, Arben Vitia, ishte deklaruar i sigurt se nga muaji shtator e tutje nuk do të ketë më mungesë të barnave, veçanërisht të insulinave.
“Në muajt shtator dhe tetor nuk do të ketë fjalë mungesë në terminologji, për barnat dhe materialet shpenzuese dhe insulina”, kishte thënë Vitia.
Megjithatë, derisa jemi në fund të muajit tetor, disa barna esenciale vazhdojnë të mungojnë në Qendrën Kryesore të Mjekësisë Familjare në Prishtinë. Pacientët thonë se nuk po arrijnë t’i sigurojnë barnat dhe insulinat në barnatoren qendrore pranë kësaj qendre.
“Shqetësuese se pensioni i vogël, po duhet me ble 100 euro për çdo muaj se s’ka këtu në barnatore në qendër, e po duhet në privat me i ble barnat ma të thjeshta”, thotë një pacient.
“Sigurisht që duhet me pas ma shumë barna se ka nevojë, Qeveria i ka fajet, qytetaret s’jemi tu pas mundësi me i ble ma, se s’po ka boll barna as sen”, tha një tjetër pacient.
Si pasojë e kësaj gjendjeje, pacientët detyrohen që barnat që do të duhej t’i merrnin falas, t’i blejnë ato në barnatore private.
“Bashkëshorti o me diabet e unë kam sëmundjen e harresës, e krejt këto barna po duhet me i ble me i siguru vetë nëpër barnatore private”, shprehet një pacient.
Pavarësisht tentimeve të televizionit për të kuptuar se si qëndron problemi me barnat, askush nga menaxhmenti i Barnatores qendrore dhe Qendrës Kryesore të Mjekësisë Familjare në Prishtinë, nuk u deklaruan.
Në anën tjetër, Ministria e Shëndetësisë ka mohuar mungesën e barnave në këtë qendër. Sipas tyre, furnizimi i fundit me barna esenciale dhe insulina është bërë para 12 dite.
“Ministria e Shëndetësisë ka në kompetencë furnizimin e QKMF-ve me barna, material shpenzues dhe disa programe specifike. Sipas kërkesës së tyre, përmes Sistemit të Menaxhimit të Stokut Farmaceutik (SMSF), QKMF në Prishtinë është furnizuar me barna dhe material shpenzues me datë 11.10.2023, po ashtu, furnizimi me Insulina është bërë në këtë datë”, thuhet në përgjigjen e MSH-së.
Madje, ky dikaster ka bërë të ditur se këtë vit asnjë tender nuk ka dështuar, sa i përket furnizimit me insulina në të gjitha Qendrat e Mjekësisë.
Ndryshe, Qeveria ka ndarë 60 milionë euro për mbulimin e listës së barnave esenciale.
