Përgatiti: Donisa Fazliu
Punën dhe përgjegjësinë me kolegët e saj e kanë të njëjtë, por koristja Fjolla Gashi-Dobruna, pagën e ka më të ulët. Tash e tre muaj anëtarët e Filarmonisë janë ndarë në kategori.
“Është shumë shqetësuese, është diskriminim në mes të këngëtarëve dhe në mes të pjesëtarëve të korit që e bëjnë punën e njëjtë. Unë jam njëra ndër ato që jam diskriminuar në këtë aspekt dhe pagën e marr me një koeficient të vjetër, nëse e krahasojmë me një shoqe që e kam afër, e bëjmë punën e njëjtë, shkollimin e njëjtë, të gjitha të njëjta”, tha Gashi-Dobruna.
Ankesën e njëjtë si Gashi-Dobruna, e ka edhe kryetari i sindikatës së Filarmonisë së Kosovës, Shaban Behramaj.
“Edhe unë jam pjesë e kësaj parregullsie dhe gjithë këtij gabimi që është bërë në institucionin tonë dhe kjo është arsyeja që ne kemi vendosur të reagojmë publikisht dhe të kërkojmë nga ministria e kulturës që të rregullohet sa më shpejtë dhe të nivelizohen artistët e këtij institucioni, të cilët i takojnë të njëjtës kontratë, të njëjtës përgjegjësi, por që janë të ranguar në dy koeficiente të ndryshme, kjo është shumë e padrejtë dhe ka ngjallur pakënaqësi tek muzikantët, pra tek ne”, tha Behramaj.
Nga kjo shoqatë madje paralajmëruan edhe veprime ndaj Ministrisë së Kulturës, nëse siç thonë ata shpërfillja ndaj tyre vazhdon.
Por, nga ky institucion thanë se ekzekutimi i pagave bëhet në bazë të vendimit të Qeverisë nga shkurti i këtij viti.
“Aktualisht ekzekutimi i pagave ne sektorin e artit, kulturës dhe trashëgimisë kulturore është duke ndodhur bazuar ne rregullat e ekuivalentimit te sistemit te vjetër dhe sistemit te ri te pagave sipas vendimit te Qeverise se Kosovës te datës 16.02.2023. -Ky vendim obligon institucionet te harmonizojnë sistemet e pagave dhe pas këtij procesi, te kalojnë ne klasifikimin e pozitave qe sipas ligjeve ne fuqi behet përmes aprovimit te strukturave te reja organizative.- Sa i përket ekuivalentimit, MKRS, është ne kontakt te vazhdueshëm me MPB dhe vazhdimisht raportohen rastet e korrigjimeve dhe kërkohet konfirmimi i sakte nga DMZP/MPB për këto raste”, thuhet në përgjigjen e MKRS-së.
Sipas Ministrisë së Kulturës, Rinisë dhe Sportit, janë mbi 350 raste të administruara të përcaktimit të sakte të ekuivalencës se pagave.
Më shumë detaje i gjeni në Edicionin Qendror të lajmeve në ATV, në videon më poshtë:
