Përgatiti: Pranvera Krasniqi
Në vendin ku u lind, prej mëngjesit iu dëgjuan këngët.
Ndonëse amaneti i të ndjerës Nexhmije Pagarusha ishte të varrosej në fshatin Pagarushë, 3 vjet pas vdekjes aty u përurua busti i saj. Zëri i saj dhe trashëgimia që la pas, me të cilat njihet si bilbili i Kosovës, u kujtua nga të pranishmit.
Busti kushtuar dives së muzikës popullore shqipe ishte ide e ambasadorit të Shqipërisë në Kosovë, Qemal Minxhozi i cili tashmë përfundoi mandatin e tij.
Ndërkaq kryetari i Komunës së Malishevës, Ekrem Kastrati, ka falënderuar të gjithë ata që e kanë përkrahur realizimin e këtij busti.
Mirënjohës për nderimin që ju bë ishin edhe familjarët e këngëtares
Trashëgimia muzikore e Nexhmije Pagarushës përfshin mbi 150 këngë të interpretuara. Ajo e cila konsiderohet testament i këngës shqipe është kënga “Baresha” e cila u interpretua në vazhdimin e ceremonisë me program artistik në shtëpinë e kulturës “Tahir Sinani” në Malishevë.
Nexhmije Pagarusha vdiq më 7 shkurt 2020.
Më shumë detaje i gjeni në Edicionin Qendror të lajmeve në ATV, në videon më poshtë:
