Seancën e fundit të sesionit pranveror e mbyllën me dështim.
Në seancën që dështoi për shkak të kuorumit, shumica e deputetëve që munguan ishin të pozitës.
Këtë e konsideruan të qëllimshme, partitë opozitare.
“E mbyllën këtë seancë vetëm për vetëm për të na pamundësuar që të diskutojmë rreth çështjes së aferës ‘Zdravo’”, tha deputeti i PDK-së, Abelard Tahiri.
“Janë dëme të mëdha që po i bëhen Kosovës, prandaj ne presim që në vjeshtë të kemi në situatë komplet të re, pasi kjo qeveri nuk duhet të vazhdojë”, tha deputeti i LDK-së, Arben Gashi.
“Sot jeni dëshmitar të anulimin të qëllimshëm të një seance vetëm e vetëm me i ikë përgjegjësisë të skandalit Zdravo, që tash e ka edhe një mbiemër zejtin”, tha deputeti i AAK-së, Besnik Tahiri.
Të tri partitë opozitare po vlerësojnë që kjo qeveri nuk duhet të vazhdojë më. Madje, shpresë se do ta përkrahin mocionin e mosbesimit të nisur nga AAK-ja, ka dhënë Lidhja Demokratike e Kosovës.
“Mendoj se kjo gatishmëri do të jetësohet në shtator dhe pastaj përmes mocionit ta shkarkojmë”, tha deputeti i AAK-së, Besnik Tahiri.
“Ne jemi të angazhuar maksimalisht që ata numra të sigurohen, jemi të angazhuar maksimalisht që ky Kuvend të shpërbëhet”, tha deputeti i PDK-së, Abelard Tahiri.
“Do të shohim a do të ketë brumë edhe brenda LV-së në vjeshtë, që do të dalin dhe do të votojnë një mocion për me rrezua qeverinë. Përndryshe është e pamundur”, tha deputeti i LDK-së, Arben Gashi.
Pavarësisht që opozita që renditi goxha kritika, deputeti nga pushteti, Armend Muja, e vlerësoi punën e Kuvendit të suksesshme.
Në rend dite ishin 24 pika, përfshirë edhe disa marrëveshje ndërkombëtare të cilat po dështojnë të miratohen për disa herë. /atvlive.tv
Edicionin Qendror të lajmeve në ATV e gjeni në videon më poshtë:
