Gati katër muaj pas aktgjykimit të Gjykatës Kushtetuese që e rrëzoi Ligjin për Këshillin Prokurorial, ekzekutivi miratoi në Qeveri projektligjin e ri.
Sipas këtij projektligji, sërish parashihet që institucioni i Avokatit të Popullit të ketë të drejtën që t’i ofrojë dy propozime për anëtarë joprokurorë, të cilët do të veprojnë si përfaqësues të organizatave të shoqërisë civile.
Sipas aktgjykimit të Kushtetueses, Avokati i Popullit nuk e ka këtë kompetencë.
Përveç anëtarëve aktualë të Këshillit, deri në vitin 2026, KPK-së, sipas projektligjit, do t’i shtohen edhe 8 anëtarë joprokurorë, të cilët do të zgjidhen nga Kuvendi me shumicë të thjeshtë votash.
Ndërsa, kuorumi do të jetë me 12 anëtarë.
“Nga tetë (8) anëtarët joprokurorë, dy (2) prej tyre zgjidhen në bazë të katër (4) nominimeve që pranohen nga Avokati i Popullit për përfaqësues nga radhët e anëtarëve të organizatave të shoqërisë civile, ndërsa një (1) pozitë rezervohet për profesorët universitarë të drejtësisë. Mandati i tetë (8) anëtarëve të zgjedhur zgjat deri më 11 janar të vitit 2026”, thuhet në Projektligjin për KPK-në.
Ndërkohë, Këshilli Prokurorial i Kosovës përmes një reagimi me shkrim ka thënë se miratimi i këtij projektligji është përpjekje e re për të cenuar pavarësinë e këtij institucioni.
Sipas KPK-së, Qeveria e ka miratuar projektligjin me nxitim dhe në mënyrë të njëanshme pa përfillur Strategjinë për Sundimin e Ligjit dhe procesin e reformës në drejtësi.
“Kjo nismë ligjore është dashur të realizohet në kohën e duhur, andaj çdo rikthim i iniciativave dhe i vendimeve të këtij lloji, pa respektuar ndarjen e pushteteve dhe pa koordinimin e ndërsjellë, siç ka ndodhur në të kaluarën dhe siç po ndodhë edhe tani nga ana e Qeverisë së Kosovës, është kthim i madh prapa dhe sjell dështim, andaj KPK-ja paralajmëron se do t’i ndjekë të gjitha rrugët ligjore dhe kushtetuese për ta kontestuar përmbajtjen e Ligjit të ri të KPK-së, pasi që ai cenon mandatin kushtetues dhe pavarësinë e sistemit prokurorial, si dhe anashkalon standardet ndërkombëtare, duke pamundësuar funksionalizimin e tij dhe duke e bërë atë lehtësisht të ndikuar nga politika”, thuhet në reagimin e Këshillit Prokuorial të Kosovës.
Ligji për KPK-në u miratua gjatë vitit të kaluar, por u dërgua në Kushtetuese, nga dy partitë opozitare, PDK-ja dhe LDK-ja. Pas gati nëntë muajsh, Gjykata vendosi që ligjin ta shpallë të pavlefshëm.
Kushtetuesja kishte gjetur ndër të tjera vërejtje për mënyrën e propozimit të anëtarëve joprokurorë nga Avokati i Popullit, balancimin dhe përfundimin e mandatit para kohës të anëtarëve aktualë në KPK-së. /atvlive.tv
Edicionin Qendror të lajmeve në ATV e gjeni në videon më poshtë:
