Trajneri i Kombëtares së Iranit, Amir Ghalenoei, ka shprehur pakënaqësi të madhe ndaj organizimit të ekipit të tij gjatë Kupës së Botës, duke zbuluar se skuadra u detyrua të largohej menjëherë nga Shtetet e Bashkuara dhe të kthehej në kampin stërvitor në Tijuana të Meksikës, vetëm pak orë pas barazimit 2-2 ndaj Zelandës së Re në Inglewood.
Sipas Ghalenoeit, ekipi kishte planifikuar të qëndronte gjatë natës në Kaliforni për të kryer procesin e zakonshëm të rikuperimit pas ndeshjes së parë të turneut. Megjithatë, menjëherë pas përfundimit të takimit, lojtarët u njoftuan se duhej të niseshin pa vonesë drejt Meksikës.
“Ata nuk na lanë as kohë për rikuperim. Pas ndeshjes na thanë se duhet të largoheshim menjëherë. Për ne është jetike që lojtarët të kenë kohë të rikuperohen, por në vend të kësaj po detyrohemi të udhëtojmë drejt kampit tonë në Tijuana. Kjo është shumë shqetësuese”, deklaroi trajneri iranian.
Kombëtarja iraniane po kalon një periudhë të vështirë që nga tensionet e fundit mes Iranit, SHBA-së dhe Izraelit. Pavarësisht kërkesës së Federatës Iraniane që ndeshjet e grupit të zhvendoseshin jashtë territorit amerikan, FIFA e refuzoi këtë kërkesë dhe Irani vendosi të marrë pjesë normalisht në turne.
Edhe kapiteni Mehdi Taremi kritikoi kushtet me të cilat është përballur skuadra. Ai zbuloi se ekipi kaloi rreth pesë orë në udhëtim dhe kontrolle sigurie për të përshkuar distancën mes Tijuanës dhe zonës së Los Angelesit, një rrugë që zakonisht kërkon shumë më pak kohë.
Përveç kësaj, Taremi dhe Ghalenoei ngritën shqetësime edhe për mungesën e disa anëtarëve të rëndësishëm të delegacionit iranian, përfshirë presidentin e Federatës, pjesë të stafit teknik dhe zyrtarë të medias, të cilëve autoritetet amerikane nuk u kanë dhënë viza hyrëse.
“Besoj se FIFA duhet të bëjë më shumë për ne. Situata që po përjetojmë është pothuajse katastrofike”, u shpreh Taremi.
Në aspektin sportiv, Irani arriti të shmangte humbjen në ndeshjen hapëse ndaj Zelandës së Re. Elijah Just i dha dy herë epërsinë skuadrës oqeanike, duke shënuar në fillim të secilës pjesë, por iranianët reaguan përmes Ramin Rezaeian dhe Mohammad Mohebi, i cili vulosi rezultatin përfundimtar 2-2 në minutën e 64-të.
Pas raundit të parë, situata në grup mbetet plotësisht e hapur, me Iranin që do të përballet me Belgjikën në Inglewood dhe më pas me Egjiptin në Seattle. Të katër kombëtaret e grupit kanë nga një pikë secila pas ndeshjeve të para.
