PËRGATITI: DONISA FAZLIU
Është shënuar 17-vjetori i themelimit të Inspektoratit Policor të Kosovës. Me këtë rast, është bërë edhe nënshkrimi i themelimit të Forumit Rajonal të Trupave Mbikëqyrëse Policore. Në këtë përvjetor u fol për rëndësinë e bashkëpunimit me këtë institucion, për luftimin e krimit dhe korrupsionit.
Inspektorati Policor i Kosovës, në 17-vjetorin e themelimit të tij, ka themeluar forumin rajonal të mbikëqyrjes së Policisë së Kosovës, Maqedonisë së Veriut, Shqipërisë dhe Malit të Zi.
Sipas kryeshefit ekzekutiv të Inspektoratit Policor të Kosovës, Kushtrim Hodaj, themelimi i këtij forumi është i rëndësishëm për shkëmbimin e informacioneve.
“Ky forum do të jetë një mekanizëm dhe platformë e rëndësishme në shkëmbim të informacioneve, praktikave të mira, trajnimeve të përbashkëta, por edhe aktiviteteve të përbashkëta inspektuese dhe hetuese. Forumi do të jetë organizim i përbashkët dhe do të udhëhiqet me rotacion dhe do të mbetet i hapur për anëtarësim, edhe për agjencitë e shteteve të rajonit, por edhe më gjerë”.
Ndërkaq, shefja e kabinetit të Ministrit të Punëve të Brendshme, Jeta Tela-Shema, theksoi rëndësinë e bashkëpunimit me këtë institucion, për luftimin e krimit dhe të korrupsionit.
“IPK-ja në vizionin e Ministrisë zë një vend të jashtëzakonshëm. Prioritet për ta luftuar krimin e organizuar është vështirë e realizueshme pa policinë. Gjithë këto vite, falë edhe mbështetjes së bashkëpunëtorëve tanë, IPK-ja është angazhuar për policinë me integritet karshi qytetarëve tanë”.
Pjesë e kësaj ceremonie ishte edhe atasheu i Departamentit të Drejtësisë nga Ambasada e Shteteve të Bashkuara të Amerikës në Prishtinë, Kimberly Riffe. Ajo foli për sfidat e këtij institucioni gjatë vitit të kaluar.
“Nevoja për IPK-në që të sigurojë që veprimet policore janë të ligjshme dhe në përputhshmëri me rregulloret e brendshme, kjo është një detyrë shumë e rëndësishme të cilën ju jeni dedikuar dhe e bëni çdo ditë. Ju lutem vazhdoni të jeni një agjenci, ku njerëzit, qytetarët mund të bëjnë ankesa, duke ditur se ju do t’i aplikoni principet ligjore, duke siguruar një proces demokratik në hetimin dhe zbulimin e të vërtetës dhe fakteve në mënyrë transparente”.
Në raportin e vitit të kaluar të IPK-së thuhet se janë pranuar mbi 1690 ankesa, 34 për qind prej të cilave janë orientuar për hetim penal në Departamentin e Hetimit. Po ashtu, janë arrestuar 108 punonjës dhe qytetarë nën dyshimin për përfshirje në krim dhe është rekomanduar suspendimi i 164 punonjësve policorë.
