Kombëtarja e Kosovës luan në këto dy javë shansin e saj për të shkuar në ngjarjen më të madhe të futbollit botëror, Kupën e Botës.
Për herë të parë Kosova luan në play-off, ku përballë do të ketë fillimisht Sllovakinë, e në rast suksesi, më pas do të shkojë në finalen ndaj Turqisë ose Rumanisë.
Nëse arrin kualifikimin historik, Kosova do të marrë një shpërblim të madh nga FIFA.
Për çdo ekip që siguron biletën për aktivitetin në SHBA, FIFA ka caktuar një pagesë prej 1,5 milionë dollarësh, i cili i akordohet menjëherë për të përballuar shpenzimet dhe pjesën e organizimit të logjistikës para dhe gjatë aktivitetit.
Më pas, çdo pjesëmarrës ka të garantuar një tjetër shumë prej 9 milionë dollarësh si bonus, për ta shpenzuar si ta shohë të arsyeshme.
Një shifër jashtëzakonisht e madhe vetëm për praninë në turne, ndërsa ka bonuse të tjera për kalimin e tureve deri në finalen e madhe të turneut, me fituesen që do të marrë një çek prej 50 milionë dollarësh.
