Doktoresha Merita Emini Sadiku në emisionin “LIBERO” ka ndarë një rrëfim personal mbi sfidat e saj në krijimin e familjes, duke theksuar se presioni shoqëror për “kohën e duhur” nuk duhet të përcaktojë jetën e askujt.
Ajo tregoi se ka kaluar katër procedura IVF për të pasur fëmijë, një rrugëtim i gjatë dhe emocionalisht i vështirë. Megjithatë, përkundër sfidave, Sadiku theksoi se nuk e ka lejuar veten të bjerë në depresion.
“E kam përvojën time personale në krijimin e familjes në moshë pak më të shtyer se zakonisht, por asnjëherë s’kam rënë pre e idesë që po më ikën koha biologjike” – u shpreh ajo.
Diskutimi për një “kohë të duhur” për arritjet në jetë, sipas saj, shpesh është më shumë presion shoqëror sesa realitet personal. Doktoresha shtoi se zgjedhja për të mos u ndalur dhe për të mos u fokusuar vetëm te një sfidë e vetme ka qenë vendimtare.
“…Nuk ka qenë zgjedhja ime të ndalem dhe të bie në depresion për atë problem. Kam pasur objektiva të tjera për t’i arritur dhe ato më kanë dhënë kënaqësi në jetë…”, deklaroi doktoreshë Merita.
Vendimi për të ndjekur trajtimet IVF ishte një hap i menduar mirë, që në fund i solli përmbushjen që kërkonte. Ajo u bë nënë për herë të parë në moshën 35-vjeçare, ndërsa fëmijën e dytë e solli në jetë në moshën 43-vjeçare.
Vlen ta theksojmë se sipas Britannica, IVF (In Vitro Fertilization) është një procedurë mjekësore e ndihmuar për të trajtuar infertilitetin, ku vezët e gruas fekondohen me spermë jashtë trupit, në një laborator, dhe më pas embrionet e krijuara transferohen në mitrën e gruas për të mundësuar shtatzëni.
Për ta dëgjuar diskutimin e plotë rreth temës: “A ka një kohë “të duhur” për t’i arritur gjërat në jetë”?, klikoni në linkun e mëposhtëm:
