Të paktën 10 persona janë vrarë nga sulmet ajrore izraelite në lindje të Libanit, kanë bërë të ditur zyrtarët libanezë.
Ushtria e Izraelit tha se ka goditur objektiva që i përkasin Hezbollahut – një grup ushtarak dhe politik i mbështetur nga Irani – në Luginën Bekaa, një zonë ku grupi ka prani të fortë.
Hezbollahu konfirmoi se të paktën gjashtë nga anëtarët e tij janë vrarë, përfshirë një komandant të lartë në terren, raporton BBC, transmeton Sinjali.
Sulmet konsiderohen ndër më vdekjeprurëset në Liban që nga armëpushimi që i dha fund luftës mes Izraelit dhe grupit shiit në nëntor 2024. Që prej marrëveshjes së armëpushimit, e cila pasoi 13 muaj konflikt, Izraeli ka kryer pothuajse çdo ditë sulme në Liban.
Izraeli tha se sulmet e së premtes erdhën pas “një shkeljeje të mirëkuptimeve mes Izraelit dhe Libanit”.
Sipas fazës së parë të armëpushimit, të ndërmjetësuar nga SHBA-ja dhe Franca, si trupat izraelite ashtu edhe luftëtarët e Hezbollahut duhej të tërhiqeshin nga Libani jugor.
Pamjet e publikuara online nga një prej lokacioneve të goditura tregojnë dëme të mëdha në një zonë që dukej të ishte lagje e banuar.
Në një deklaratë, ushtria izraelite tha se ka goditur “qendra komanduese të Hezbollahut” dhe se grupi “i vendos sistematikisht asetet e tij brenda popullatës civile”.
