Mbrëmë është votuar Qeveria “Kurti 3”, e cila do të ketë gjithsej 19 ministri, katër më shumë se në mandatin e kaluar, transmeton IndeksOnline.
Rritja e numrit të ministrive vjen pavarësisht se në të kaluarën zyrtarë të Lëvizjes Vetëvendosje kishin kritikuar qeveritë e mëparshme për kabinetet e zgjeruara, ndërsa tani edhe ekzekutivi i ri ka ndjekur të njëjtën praktikë.
Katër ministritë e reja që i janë shtuar strukturës qeveritare janë: Ministria për Çështje të Pakicave dhe Bashkëpunim Ekonomik, Ministria për Familje dhe Mirëqenie Sociale, Ministria e Sportit dhe Rinisë (e ndarë nga Ministria e Kulturës) dhe Ministria për Zhvillim Rajonal.
Sipas kryeministrit Albin Kurti, drejtuesit e këtyre ministrive do të jenë: Fikrim Damka, Ministër për Çështje të Pakicave dhe Bashkëpunim Ekonomik, Andin Hoti, Ministër për Familje dhe Mirëqenie Sociale, Blerim Gashani, Ministër i Sportit dhe Rinisë dhe Rasim Demiri, Ministër për Zhvillim Rajonal.
Me këtë përbërje, kabineti i ri qeveritar synon të zgjerojë fushat e veprimit në politika sociale, zhvillim rajonal, përfshirje të komuniteteve dhe mbështetje për rininë dhe sportin.
