Interesante është që Shtetet e Bashkuara renditen të katërtat me 55 pikë.
Gazeta ruse Vzgljad ka përpiluar dhe ka publikuar të martën “Rejtingun e qeverive armiqësore” për të treguar dallimin mes shteteve që kundërshtojnë me vetëdije Rusinë dhe atyre që, sipas tyre, “janë shtyrë në këtë vendim kundër dëshirës së tyre nga rrethanat gjeopolitike”.
Ata kanë renditur vetëm shtetet dhe territoret që ndodhen në listën e vendeve armiqësore të publikuar në vitin 2021. Vendin e parë e zuri Britania e Madhe me 75 pikë, të cilat i kanë “merituar” për shkak të sanksioneve ndaj kompanive ruse të naftës, si dhe faktit që mbështesin transferimin e fondeve ruse në dobi të Ukrainës dhe dërgimin e armëve për Kievin.
Britania, Gjermania dhe Franca kryesojnë listën
Sipas Vzgljad, vendin e parë e zë Britania me 75 pikë, kryesisht për shkak të sanksioneve të reja ndaj kompanive ruse të naftës dhe mbështetjes për transferimin e aseteve ruse në Ukrainë.
Në vendin e dytë renditen Gjermania dhe Franca me 70 pikë, të cilat konsiderohen si dy ndër shtetet evropiane që ofrojnë ndihmën më të madhe financiare për Ukrainën.
Vendi i tretë ndahet mes Holandës dhe Estonisë, me nga 65 pikë.
SHBA në vendin e katërt
Shtetet e Bashkuara, që shpesh perceptohen si kundërshtari kryesor i Moskës, renditen vetëm të katërtat me 55 pikë, bashkë me Letoninë dhe Çekinë. Sipas Vzgljad, pozita më e ulët e SHBA-së lidhet me vonesat dhe pezullimet e përkohshme të ndihmës ushtarake për Ukrainën.
Kroacia në vendin e 7-të
Numri më i madh i vendeve ndodhet në vendin e pestë (50 pikë): Danimarka, Italia, Kanadaja, Lituania, Polonia, Finlanda dhe Suedia.
Pas tyre renditen Norvegjia dhe Belgjika me 45 pikë.
Në vendin e shtatë, me 40 pikë, gjenden Greqia, Spanja dhe Kroacia.
Shqipëria – ndër më pak “armiqësoret”: vetëm 5 pikë
Në fund të listës, me rezultatin më të ulët prej 5 pikësh, gjenden disa vende të cilat Rusia i vlerëson si më pak armiqësore. Ndër to përmenden:
• Shqipëria
• Bahamas
• Lihtenshtajni
• Mikronezia
• Monako
• Koreja e Jugut
• San Marino
Kjo e vendos Shqipërinë në grupin e vendeve që, sipas vlerësimit zyrtar rus, kanë më pak masa kundër Rusisë.
Kosova nuk figuron fare në listë
Kosova nuk është e përfshirë në listën ruse të vendeve armiqësore, për shkak se Rusia nuk e njeh shtetësinë e saj dhe prandaj nuk e klasifikon si subjekt të marrëdhënieve shtetërore. Për këtë arsye, ajo nuk ka fare vlerësim në renditje.
Konteksti rus: Nga “vendet armiqësore” te “qeveri armiqësore”
Ministri i Jashtëm rus, Sergej Lavrov, ka deklaruar se Rusia po largohet gradualisht nga përdorimi i termit “vendet armiqësore” dhe po e zëvendëson me “qeveri armiqësore”, me arsyetimin se nuk dëshiron të etiketojë popujt, por vetëm elitat politike që marrin vendimet.
Presidenti Vladimir Putin ka theksuar të njëjtën qasje, duke thënë:
“Ne nuk kemi vende armiqësore, kemi elita armiqësore.”
