Rreth 6 mijë protestues nga trojet shqiptare pritet të marrin pjesë në protestën e paralajmëruar nga Organizata e Veteranëve të Luftës së UÇK-së (OVL-UÇK) më 16 nëntor në Strasburg, përballë Asamblesë së Përgjithshme të Këshillit të Evropës.
Protesta organizohet si kundërshtim ndaj, siç thonë organizatorët, padrejtësive që po u bëhen ish-krerëve të UÇK-së në Hagë.
Kryetari i OVL-UÇK-së, Hysni Gucati, tha se përgatitjet janë drejt përfundimit dhe se koordinimet me mërgatën dhe këshillin organizativ në Evropë tashmë janë bërë.
“Jemi në fazën finale të përgatitjeve. Kemi mbajtur takime me diasporën në disa shtete të Evropës. Më 16 nëntor, në orën 13:00, para Këshillit të Evropës, do të ngrisim zërin pikërisht aty ku është miratuar rezoluta e Dick Marty-t, një dokument i mbushur me gënjeshtra’, tha Gucati.
Sipas tij, pjesëmarrës nga Kosova, Shqipëria dhe Maqedonia e Veriut kanë siguruar bileta të lira kryesisht për në Bazel dhe Shtutgard.
“Presim mbi 5 deri 6 mijë pjesëmarrës. Vetëm nga Kosova pritet të jenë mbi 1000 udhëtarë,” u shpreh ai.
Gucati konfirmoi se interesimi i lartë ka ndikuar që disa kompani t’i rrisin çmimet e biletave.
“Disa kompani i kanë shtrenjtuar biletat nga 72 në 120 euro. Më vjen keq, sepse disa qytetarë nuk do të kenë mundësi të vijnë,” tha ai.
Ai theksoi se hotelet në Strasburg tashmë janë të mbushura me rezervime nga pjesëmarrësit, ndërsa shumë shqiptarë po vendosen në qytetet përreth.
“Strasburgu është bllokuar nga rezervimet. Shumë shqiptarë kanë kaluar deri në Kolmar për të gjetur vend,” shtoi ai, duke kujtuar se protestat e kaluara kanë tejkaluar pritjet.
Gucati tha se OVL-UÇK dhe organizatat e dala nga lufta nuk kanë marrë asnjë mbështetje financiare nga qeveria dhe se gjithçka është organizuar nga donatorët.
