I dërguari i posaçëm i Shteteve të Bashkuara të Amerikës për Ballkanin Perëndimor, Gabriel Escobar, në takimin e tij të sotëm me gazetarë, tha se, në koordinim me partnerët evropianë, janë duke punuar që të ketë zgjedhje të reja në veri të vendit, transmeton ATV.
Ai tha se serbët duhet të jenë të pranishëm në institucione, duhet të marrin pjesë në zgjedhje, pa parakushte.
“Mesazhi që do ta përçojmë është i njëjtë. Serbët duhet të jenë të pranishëm në institucione, duhet të marrin pjesë në zgjedhje, pa parakushte. Ne e kuptojmë se pasi të jenë zgjedhur, do të kenë zë legjitim që të ngrenë shqetësimet që kanë, dhe ata kanë shqetësime legjitime, siç po thosha më parë”, tha Escobar.
Ai tha se, përmes themelimit të Asociacionit, do të shtendoset kontrolli i Serbisë në veri dhe të kthehet në kontrollin e Kosovës.
“Asociacioni është mënyrë nëpërmjet të cilit shtendoset kontrolli i Serbisë në veri dhe të kthehet në kontrollin kosovar. Nën kushtetutën tuaj dhe strukturën tuaj ligjore. Andaj mendoj se është një mundësi për të lëvizur para. Nuk e kuptoj se pse ndokush do ta shihte ndryshe, sepse asociacioni, në fund të ditës, edhe nëse nuk është negociuar ndërmjet Serbisë dhe Kosovës, nuk është domosdo një koncesion për Serbinë. Është një njohje e nevojave të komunitetit pakicë”, tha Escobar. /atvlive.tv
Emisionin e plotë e gjeni në videon më poshtë:
