Sean Dyche është zyrtarisht trajneri i ri i Nottingham Forest. 54-vjeçari, i cili në rininë e tij ishte pjesë e akademisë së klubit, ka firmosur një kontratë që do ta mbajë në “City Ground” deri në verën e vitit 2027. Ai pritet të debutojë në pankinë që të enjten, në ndeshjen kundër FC Porto në Ligën e Evropës.
Dyche merr vendin e Ange Postecoglou, i cili u shkarkua pas një serie zhgënjyese prej tetë ndeshjesh pa fitore në krye të ekipit.
Emërimi i tij vjen pas një procesi të përshpejtuar rekrutimi të udhëhequr nga Drejtori Global i Futbollit, Edu Gaspar, dhe Drejtori Teknik Global, George Syrianos. Ndër kandidatët e konsideruar ishin edhe Roberto Mancini dhe Marco Silva, por në fund drejtuesit vendosën për eksperiencën dhe profilin e Dyche.
“Nottingham Forest ka kënaqësinë të konfirmojë emërimin e Sean Dyche si trajnerin e ri të ekipit të parë, pas një procesi të plotë rekrutimi të udhëhequr nga Edu Gaspar dhe George Syrianos,” thuhet në njoftimin zyrtar të klubit.
I njohur për disiplinën taktike, qëndrueshmërinë dhe organizimin mbrojtës, Dyche do të ketë në staf dy bashkëpunëtorët e tij të besuar: Ian Woan dhe Steve Stone – legjenda të Forest me mbi 400 paraqitje për klubin gjatë viteve ’90.
Me një dekadë të suksesshme te Burnley dhe një periudhë stabilizuese te Everton, Dyche është konsideruar si një nga trajnerët më të respektuar në futbollin anglez.
Tani, ai kthehet te klubi ku filloi rrugëtimin e tij si futbollist, me misionin për të nxjerrë Forest nga zona e rënies dhe për të rikthyer identitetin dhe stabilitetin në skuadër. /ATVLIVE.TV
