Danijel Smigiq, shoferi i nënkryetarit të Listës Serbe Igor Simiq, ishte ndër personat më të dhunshëm në protestën e së hënës (29 maj), ku si rezultat i egërsisë së protestuesve u lënduan 30 paqeruajtës të KFOR-it.
Eksperti i çështjeve të sigurisë, Agim Musliu ka shpërndarë një video në rrjete sociale ku edhe shihet Smigiq tek godet pa ndalim ushtarët e misionit të NATO-s në Kosovë, raporton KosovaPress.
“Danijel #Smigic, shoferi i Igor #Simiç, udhëheqës i @srpskalista, ishte një nga personat më të dhunshëm në protestën e djeshme në veri të #Kosovës, ku u plagosën më shumë se 25 ushtarë të #NATO-s”, ka shkruar të martën Musliu.
Serbët në veri janë duke protestuar që nga e premtja.
Protestuesit me maska e edhe ata pa maska kanë ushtruar dhunë ndaj pjesëtarëve të KFOR-it, Policisë së Kosovës dhe gazetarëve. Ata kanë hedhur gjësende të ndryshme në drejtim të paqeruajtësve, derisa kanë dëmtuar vetura të mediave, duke e djegur tërësisht veturën e një televizioni.
Shtetet e Bashkuara kanë kritikuar Kosovën për përshkallëzimin e tensioneve me Serbinë, derisa anuluan edhe pjesëmarrjen e vendit në një stërvitje ushtarake të NATO-s “Defender 23”, pasi Prishtina refuzoi t’i tërheqë kryetarët e komunave dhe forcat e saj policore nga veriu i vendit.
