Leon Avdullahu, talenti i ri i futbollit me rrënjë nga Kosova, ka marrë një vendim të rëndësishëm dhe emocionues për të ardhmen e tij sportive, duke zgjedhur të përfaqësojë Kombëtaren e Kosovës në arenën ndërkombëtare. Ky është një moment kyç në karrierën e 21-vjeçarit, i cili synon të japë maksimumin dhe të kontribuojë fuqishëm për ekipin kombëtar të vendit të tij të origjinës.
Ai ka lindur dhe është rritur në Zvicër, megjithatë, lidhjet e tij me Kosovën janë të thella, pasi rrënjët e familjes së tij janë nga Komuna e Kamenicës.
Për më tepër, kjo verë shënoi një hap të madh në karrierën e tij, pasi u transferua te klubi gjerman i Hoffenheim, një skuadër që garon në Bundesligë dhe ku ka mundësinë të zhvillojë më tej aftësitë e tij në një nga ligat më konkurruese të botës. Transferimi u realizua për një shumë prej 8 milionë eurosh, duke dëshmuar vlerën dhe besimin që klubi gjerman ka në talentin e tij.
Nga ana ndërkombëtare, Avdullahu ka një eksperiencë të pasur me Zvicrën, ku ka përfaqësuar vendin në të gjitha grupmoshat, nga U15 deri në U21, duke grumbulluar shumë eksperiencë dhe duke zhvilluar stilin e tij të lojës në nivele të ndryshme. Megjithatë, pavarësisht ftesës së marrë nga Kombëtarja A e Zvicrës, Leoni ka marrë vendimin e guximshëm dhe me zemër të luajë për Kosovën, duke treguar kështu lidhjen dhe dashurinë për origjinën e tij.
Nga ana tjetër, nuk kan munguar edhe shkrimet e mediave zvicerane, të cilat shkruajnë se “Helvetikët” e kanë përjetuar rëndë këtë vendim të futbollistit të lindur e rritur në Zvicër.
Redaktori i sportit në “Blick”, Emanuel Gisi, ka thënë se “refuzimi i Avdullahut është një shuplakë e rëndë në fytyrë për Zvicrën. Kjo është një humbje e hidhur për Federatën Zvicerane.”
Edhe Federata Zvicerane e Futbollit e ka komentuar këtë vendim për herë të parë.
“Leoni na informoi për vendimin e tij. Jemi të zhgënjyer që ai tani dëshiron të ndjekë një rrugë tjetër”, ka thënë drejtori i ekipit kombëtar Pierluigi Tami.
Debutimi i Avdullahut me fanellën e Kosovës pritet të ndodhë më 5 shtator në ndeshjen pikërisht kundër Zvicrës të vlefshme për kualifikimet e Kampionatit Botëror 2026. /ATVLIVE.TV
