Inspektorati Policor i Kosovës ka rekomanduar suspendimin e një zyrtari policor për shkak të një incidenti në Ferizaj.
Ngjarja ka ndodhur mbrëmë para mesnatës kur disa zyrtarë policorë edhe pse e kishin sinjalizuar ndaljen e një veture, e njëjta nuk ishte ndaluar.
Pas disa minutash ndjekjeje, policia arriti ta ndalonte veturën ku ndodheshin tre persona. Dyshohet se gjatë arrestimit, ndaj drejtuesit të mjetit, policia kishte përdorur forcë të tepruar, duke shkaktuar lëndime trupore.
IPK-ja ka nisur hetimet për tejkalim të autorizimeve dhe keqpërdorim të forcës, në bashkëpunim me prokurorinë kompetente.
