Për herë të 40-të me radhë ka dështuar konstituimi i legjislaturës së nëntë të Kuvendit të Kosovës.
Në sallë ishin të pranishëm 100 deputetë, por mungesa e kuorumit për votimin e komisionit që mundëson votimin e fshehtë e bëri të pamundur vazhdimin e seancës.
Kryesuesi Avni Dehari u kërkoi partive politike të propozojnë emrat për përbërjen e komisionit, por diskutimi u shoqërua me tensione në sallë. Mikrofonët iu ndërprenë disa deputetëve që kërkuan fjalën jashtë pikës së rendit të ditës.
Deputetja e PDK-së, Blerta Deliu-Kodra, i bëri thirrje Deharit të respektojë aktgjykimin e Gjykatës Kushtetuese, ndërsa kolegu i saj nga LDK, Armend Zemaj, përsëriti të njëjtën kërkesë.
Në mbështetje të tyre reagoi edhe deputetja Sala Jashari, e cila kundërshtoi ndërprerjen e fjalës së kolegëve.
Në fund, deputetja Time Kadrijaj njoftoi se AAK ka ndryshuar qëndrim dhe propozon Albin Kurtin si anëtar të komisionit.
Pavarësisht 51 votave pro, komisioni nuk mori mbështetjen e nevojshme. Seanca u ndërpre, ndërsa Dehari njoftoi se Kuvendi do të mblidhet sërish më 3 korrik në orën 11:00, në përputhje me afatin 30-ditor të vendosur nga Kushtetuesja.
