Presidentja e vendit, Vjosa Osmani ka reaguar pas tragjedisë në Prizren ku mëngjesin e së martës një person ka therur për vdekje vajzën e tij 15-vjeçare ndërsa ka lënë të lënduar rëndë vajzën tjetër 10-vjeçare.
Osmani u ka bërë thirrje organeve të drejtësisë që të veprojnë me “forcën maksimale të ligjit, pa asnjë mëshirë ndaj dhunës”.
“Shtëpia nuk duhet kurrë të kthehet në skenë krimi”, shkroi Osmani në Facebook, transmeton KosovaPress.
Osmani tha se ky është akt barbar dhe jo vetëm një krim.
“Kur brenda katër mureve të shtëpisë – aty ku duhet të ketë dashuri, siguri dhe ngrohtësi – ndodh një krim kaq i rëndë sikur ky që ndodhi sot, ku njëra vajzë vritet nga dora e babait dhe vajza tjetër mbetet e plagosur së bashku me nënën e saj, nuk jemi më vetëm përballë një tragjedie familjare. Jemi përballë një drame shoqërore, një alarm që kumbon fort për të gjithë. Për secilën shoqëri e secilin shtet”, shkroi Osmani në Facebook.
Presidentja Osmani kërkoi zbardhje të plotë të rastit e ndëshkim maksimal.
“Por drejtësia pas tragjedisë nuk mjafton. Kërkohet parandalim! Parandalim për të ndalur dorën që godet, për të shpëtuar jetët që sot janë të pambrojtura. Nuk mundemi kurrsesi të kthejmë kokën anash! Nuk ka më “është punë familjare” kur dhuna gërryen nga brenda zemrën e një shoqërie. Shtëpia nuk guxon të bëhet vend i frikës. Duhet të mbetet strehë e shenjtë”, tha Osmani.
Zëdhënësi i Policisë së Kosovës, Shaqir Bytyçi ka bërë të ditur për KosovaPress se në vendin e ngjarjes fillimisht kanë hasur në tre persona të lënduar, e më pas njëra ka ndërruar jetë.
“Rreth orës 06:00 kemi pranuar informatë se një person është me thikë në dorë në rrugën ‘Shotë Galica’. Policia ka dal në vendin e ngjarjes, ku ka parë tre persona të lënduar, dhe njëra nga të lënduarat ka ndërruar jetë”, ka thënë ai.
I dyshuari, me shtetësi turke, tashmë është arrestuar.
