Përgatiti: Driton Sadiku
Për produktin e njëjtë, qytetarët vazhdojnë të paguajnë çmime të ndryshme nëpër barnatore.
Ndonëse, ligji për çmimin e produkteve medicinale që nivelon çmimin e barnave, ka kaluar në Kuvend në korrik të vitit të kaluar, ai ende nuk po zbatohet në praktikë.
Kësisoj farmacitë vazhdojnë të shesin barna me çmimet që i vendosin vetë ata.
Vetë Ministri i Shëndetësisë, Arben Vitia, kishte thënë se po bëjnë punë të madhe, në ditën kur ai kaloi në qeveri, në mars të vitit të kaluar.
Por, nga Ministria që ai udhëheq nuk treguan për arsyet e moszbatimit të këtij ligji, as nëntë muaj pas plotfuqishmërisë së tij. Megjithatë, pak detaje për këtë dha Oda e Farmacistëve.
“Ky ligj është planifikuar të zbatohet në muajin janar të këtij viti, por për disa probleme teknike ka filluar në muajin prill, pra tani ka filluar procedura e aplikimit për të gjitha produktet që kanë autorizim marketingu, apo produktet që janë të regjistruara në agjencinë për produktet dhe pajisjet medicinale”, tha zv.drejtori i Odës së Farmacistëve, Astrit Haxhijaha.
Pasi tha se e mirëpresin zbatimin e këtij ligji, zv/drejtori i odës, Astit Haxhijaha, tregon për dobitë e këtij ligji në interes të qytetarëve.
“Do të ketë shumë përparësi, pra në mënyrë direkte do të ndikojë tek ulja e çmimit të barnave që do të ndikojë edhe te pacientët, pastaj do të minimizohen tregtimet e produkteve dhe në mënyrë direkte do të jetë edhe pjesa e konkurrencës profesionale dhe do të eliminohet konkurrenca e pjesës së çmimeve”, tha Haxhijaha.
Sipas Haxhijahës, për vendosjen e çmimeve për barna do të vendosë një komision, brenda Ministrisë së Shëndetësisë dhe pas asaj çmimet që do të jetë të njëjta në të gjitha barnatoret do të vendosen në banderolë të secilit produkt.
