Sulmuesi i Kombëtares së Shqipërisë, Mirlind Daku, është zyrtarisht futbollist i Spartak Moskës. Klubi rus konfirmoi të enjten transferimin e 27-vjeçarit nga Rubin Kazan, duke i dhënë fund spekulimeve që e shoqëruan javët e fundit.
Spartaku e prezantoi Dakun përmes kanaleve zyrtare, duke e cilësuar atë si një nga sulmuesit më të mirë të kampionatit rus.
“Mirlind Daku është sulmuesi i ri i Spartakut. Njëri nga sulmuesit më të fortë në Superligën e Rusisë ka nënshkruar kontratë trevjeçare me klubin kuqezi”, thuhet në njoftimin e klubit.
Transferimi u finalizua pavarësisht reagimeve të një pjese të tifozëve të Spartakut, të cilët shprehën kundërshtimin e tyre për afrimin e sulmuesit shqiptar, madje në ndeshjen e fundit të skuadrës u panë edhe pankarta dhe u dëgjuan thirrje fyese ndaj Kosovës dhe shqiptarëve.
Sipas raportimeve, Daku do të përfitojë një pagë vjetore prej rreth 3.3 milionë eurosh, ndërsa në marrëveshje është përfshirë edhe një bonus nënshkrimi prej 1.5 milionë eurosh.
Daku largohet nga Rubin Kazani pas tre sezonesh të suksesshme, ku u shndërrua në një nga sulmuesit më të spikatur të elitës ruse. Ai realizoi 38 gola dhe dhuroi 10 asistime në 89 ndeshje, duke shënuar të paktën 10 gola në secilin sezon.
Te Spartak Moska, reprezentuesi shqiptar do të mbajë fanellën me numrin 19, ndërsa pritet të jetë një nga emrat kryesorë të repartit ofensiv për sezonin e ri.
