Albion Rrahmani ka realizuar një tjetër hap të madh në karrierën e tij. Sulmuesi i Kombëtares së Kosovës është zyrtarisht futbollist i Venezias, pasi klubi italian konfirmoi transferimin e tij nga Sparta e Pragës.
Skuadra veneciane, e rikthyer këtë sezon në elitën e futbollit italian, njoftoi se Rrahmani ka firmosur një kontratë afatgjatë, e cila do ta mbajë të lidhur me klubin deri më 30 qershor 2029.
“Venezia FC njofton transferimin e përhershëm të sulmuesit Albion Rrahmani nga Sparta e Pragës. Futbollisti kosovar ka nënshkruar kontratë me klubin deri më 30 qershor 2029”, thuhet në komunikatën zyrtare të klubit.
Menjëherë pas prezantimit, 24-vjeçari nuk e fshehu entuziazmin për nisjen e kësaj aventure në Serie A, duke theksuar se projekti i Venezias ishte vendimtar në zgjedhjen e tij.
“Venezia është një klub me histori të pasur dhe me një vizion shumë ambicioz për të ardhmen. Gjatë bisedave që zhvilluam mbeta vërtet i impresionuar nga projektet dhe objektivat e klubit”, deklaroi Rrahmani.
Ai shtoi se të përfaqësojë një qytet si Venecia dhe një klub me tifozë kaq besnikë është një motivim i madh për të.
“Është një privilegj të luaj për një klub që përfaqëson një qytet kaq unik. Mbështetja e tifozëve më motivon edhe më shumë dhe premtoj se do të jap gjithmonë maksimumin në fushë. Bashkë me skuadrën do të luftojmë në çdo ndeshje për të arritur objektivat dhe për t’u dhënë tifozëve sa më shumë arsye për t’u krenuar”, u shpreh sulmuesi kosovar.
Sipas raportimeve, Venezia ka investuar rreth 7.5 milionë euro për kartonin e Rrahmanit, duke e bërë atë një nga transferimet më të rëndësishme në historinë e klubit. Pas paraqitjeve të mira me Spartën e Pragës, sulmuesi llapjan tashmë do të ketë mundësinë të dëshmojë vlerat e tij në një nga kampionatet më prestigjioze të futbollit evropian.
