PËRGATITI: ARIAN HAJDARAJ
Vula dhe stema e Zyrës së Inspektorit të Përgjithshëm u miratuan në mbledhjen e fundit të Qeverisë.
Por, kryeinspektori i kësaj agjencie ekzekutive që do të funksionojë në kuadër të Zyrës së Kryeministrit, nuk është zgjedhur ende, edhe pse ka kaluar gati një vit e gjysmë, nga miratimi i ligjit për Inspektimet.
Derisa nga Qeveria konfirmojnë për televizionin se në vazhdën e konsolidimit ka nisur procesi i rekrutimit për pozita të tjera, ajo e Inspektorit të Përgjithshëm vazhdon të jetë me ushtrues detyre.
“Zyra e Inspektorit të Përgjithshëm (ZIP) ka ushtrues të detyrës së Inspektorit të Përgjithshëm që nga data 20.02.2023. Me vendim të kryeministrit, ushtruese e detyrës së Inspektorit të Përgjithshëm, është znj. Lyra Osmani. ZIP-i është në fazë të konsolidimit dhe së fundmi ka filluar edhe procesin e rekrutimit. Në kuadër të këtij procesi tashmë janë shpallur tri konkurset e para për ZIP: Zyrtar i lartë për Legjislacion, Zyrtar i lartë për Analizë dhe Metodologji dhe Zyrtar i Lartë Ekzekutiv”, u përgjigj zëdhënësi i Qeverisë, Përparim Kryeziu.
Sipas përshkrimit të detyrës, Inspektori i Përgjithshëm do ta udhëheqë programin e reformës së inspektimit, duke koordinuar sistemin e inspektimeve brenda administratës shtetërore dhe nivelit komunal.
Kthimi i Inspektorit të Përgjithshëm në Agjenci në kuadër të Kryeministrisë, si në kohën kur u miratua ligji, edhe tash kur është në fazë konsolidimi, po kritikohet nga opozita.
Sipas pikës 4 të nenit 11 të Ligjit për Inspektimet, Qeveria mund të krijojë një komision ndërministror, të cilit Zyra e Inspektorit të Përgjithshëm gjithashtu i raporton të paktën çdo gjashtë muaj./atvlive.tv/
Për më shumë ndiqni videon e mëposhtme:
